Gervigreind hefur lækkað þröskuldinn fyrir netárásir og gert netbrjótum auðveldara að finna og nýta veikleika í tölvukerfum. Arnar S. Gunnarsson, forstöðumaður öryggislausna OK, ræddi við mbl.is um hvernig staðan hefur breyst á skömmum tíma.
Gervigreind er farin að hafa mikil áhrif á hvernig netárásir eru framkvæmdar. Verkefni sem áður kröfðust töluverðrar tæknilegrar þekkingar eru orðin mun aðgengilegri og auðveldara er að finna veikleika í tölvukerfum og nýta þá.
Í viðtali við mbl.is segir Arnar S. Gunnarsson, forstöðumaður öryggislausna OK, að þessi þróun hafi lækkað þröskuldinn verulega.
„Það er næstum hægt að segja að Jón og Gunna úti í bæ séu farin að geta gert þetta,“ segir Arnar.
Minna svigrúm til að bregðast við
Fyrirtæki hafa hingað til oft haft 30 til 90 daga til að uppfæra tölvukerfi og lagfæra veikleika eftir að þeir uppgötvast. Arnar segir að það svigrúm sé að minnka þar sem gervigreind gerir netbrjótum kleift að finna veikleika hraðar og nýta þá fyrr.
Þróunin er þegar farin að sjást hér á landi. Arnar segir í viðtalinu að OK fái stundum fjögur til fimm fyrirtæki á viku sem þurfa að bregðast við netinnbrotum. Smærri fyrirtæki eru ekki síður útsett og geta auðveldlega orðið skotmörk ef lítið hefur verið lagt í netvarnir.
Varnirnar þurfa að þróast með
Gervigreind nýtist þó ekki aðeins þeim sem standa að árásunum. Fyrirtæki eru einnig farin að nýta tæknina til varna og Arnar segir margt hægt að gera til að draga úr áhættunni.
Mikilvægt sé að fyrirtæki uppfæri verklag sitt, þjálfi starfsfólk og tryggi að varnir séu rétt uppsettar. Þróunin gerist hratt og það sem áður var talið að tæki ár er þegar farið að eiga sér stað á vikum og mánuðum.
Viðtalið við Arnar má lesa í heild sinni á mbl.is.
