Reiknistofa bankanna endurnýjar samning við Opin kerfi um alrekstur á prentumhverfi RB

Reiknistofa bankanna hefur endurnýjað samning við Opin kerfi um alrekstur á prentumhverfi þeirra.
Opin kerfi hefur séð um allan rekstur prentumhverfis RB undanfarin þrjú ár með góðum árangri og nú hefur samningurinn verið endurnýjaður með fullkominni lausn frá HP sem lýtur að auðveldari losun prentunar og auknu öryggi við útprentun. Alrekstur prentumhverfis inniheldur tæki, rekstrarvöru og alla þjónustu ásamt því að vera vaktað og öll rekstrarvara s.s. pappír send sjálfkrafa.

Prentlausnin byggir á Access Control aðgangsstýringu þar sem starfsmenn sækja sína prentun með aðgangskorti og Security Center öryggislausn frá HP sem verndar prentumhverfið fyrir utanaðkomandi ógnum. „Við erum gríðarlega ánægð með ákvörðun Reiknistofu bankanna um að framlengja prentsamning sinn við Opin kerfi um þrjú ár til viðbótar. Þetta sýnir að við uppfyllum væntingar í mjög kröfuhörðu umhverfi“ segir Jónas Þór Hreinsson viðskiptastjóri prentlausna hjá Opnum kerfum.

„Þjónusta og framkvæmd samningsins hefur gengið fullkomlega upp undanfarin 3 ár og sparað RB umtalsverða fjármuni og aukið þægindi í rekstri prentumhverfisins“ segir Magnús Böðvar Eyþórsson framkvæmdastjóri tæknireksturs og þjónustu hjá RB.

Magnús Böðvar Eyþórsson framkvæmdastjóri tæknireksturs og þjónustu hjá Reiknistofu bankanna og Sigurgísli Melberg framkvæmdastjóri sölu- og markaðssviðs Opinna kerfa.

 

Um Reiknistofu bankanna

RB er traust og öflugt þjónustufyrirtæki á sviði upplýsingatækni sem hefur þróað margvíslegar fjármálalausnir, þar á meðal öll helstu greiðslukerfi landsins. RB gegnir lykilhlutverki í því að lækka upplýsingatæknikostnað íslenskra fjármálafyrirtækja. Félagið var stofnað árið 1973 sem sameignarfélag en breytt í hlutafélag í janúar 2011.

Um Opin kerfi

Opin kerfi var stofnað árið 1985 og fagnaði því 30 ára afmæli á síðasta ári. Fyrirtækið hefur á að skipa öflugu teymi reyndra sérfræðinga á flestum sviðum upplýsingatækni og hefur langa reynslu af ráðgjöf, þjónustu og innleiðingu lausna hjá flestum af stærstu og kröfuhörðustu fyrirtækjum og stofnunum landsins. Opin kerfi er samstarfs- og þjónustuaðili Verne Global þar sem hýsingarlausnir fyrirtækisins og innri kerfi eru í dag rekin í einu fullkomnasta Tier III gagnaveri heims.

Nánari upplýsingar

Allar nánari upplýsingar veitir Jónas Þór Hreinsson, viðskiptastjóri prentlausna hjá Opnum kerfum, This email address is being protected from spambots. You need JavaScript enabled to view it. eða í síma 570-1000.

RSS veita