Þorsteinn G. Gunnarsson nýr forstjóri Opinna kerfa


Þorsteinn G. Gunnarsson hefur verið ráðinn forstjóri Opinna kerfa hf. frá og með 1. júní 2015.  Þorsteinn tekur við af Gunnari Guðjónssyni sem gegnt hefur stöðu forstjóra frá árinu 2008.

Þorsteinn Gunnarsson er rafmagnsverkfræðingur frá Háskóla Íslands, og með meistarapróf frá University of Washington. Þorsteinn er ekki ókunnugur Opnum kerfum en hann starfaði þar frá 1996 til 2008 sem framkvæmdastjóri ráðgjafar- og þjónustusviðs og síðast sem forstjóri.   Þorsteinn var stjórnarformaður Advania, meðstofnandi og stjórnarmaður í Cooori ehf.  Hann hefur verið virkur í nýsköpunarsamfélaginu, leiddi sameiningu Klaks og Innovit og er stjórnarformaður sameinaðs félags, Klak-Innovit. Þorsteinn er giftur Herdísi Rafnsdóttur og eiga þau saman drengina Rafn Viðar og Gunnar Smára.

Skipulagsbreytingar urðu hjá félaginu í október 2014 þar sem svið voru sameinuð og framkvæmdastjórum fækkað.  Í núverandi framkvæmdastjórn félagsins sitja, María Ingimundardóttir, framkvæmdastjóri ráðgjafasviðs, Guðbrandur R. Sigurðsson, framkvæmdastjóri sölu- & markaðssviðs, Elín Gränz, framkvæmdastjóri mannauðs- & þjónustusviðs, Friðþjófur Bergmann, framkvæmdastjóri vöruþróunar- & verkefnasviðs og Kristján Ólafsson, framkvæmdastjóri fjármála- & innkaupasviðs.  


Um Opin kerfi

Opin kerfi var stofnað árið 1985 og fagnar því 30 ára afmæli á þessu ári. Fyrirtækið hefur meðal annars verið dreifingar- og þjónustuaðili fyrir HP allan þann tíma og hefur á að skipa öflugu teymi reyndra sérfræðinga á flestum sviðum upplýsingatækni með langa reynslu af ráðgjöf, þjónustu og innleiðingu lausna hjá flestum af stærstu og kröfuhörðustu fyrirtækjum og stofnunum landsins. Opin kerfi er samstarfs- og þjónustuaðili Verne Global þar sem hýsingarlausnir fyrirtækisins og innri kerfi eru rekin í einu fullkomnasta gagnaveri heims í dag.

Hjá félaginu vinna um 100 manns og árleg velta er um 5 milljarðar króna

Nánari upplýsingar

Allar nánari upplýsingar veitir Elín Gränz, á This email address is being protected from spambots. You need JavaScript enabled to view it. eða í síma 570-1000.

RSS veita